Алматы облысының құқық қорғау органдары қамаудағы күдіктінің алаяқтыққа қатысты тағы екі жаңа эпизодын анықтады, деп хабарлайды alataunews.kz.
17 желтоқсанда Қонаев қаласының полиция бөліміне екі жергілікті тұрғын арызданған. Олар белгісіз адамның жеңілдетілген несие рәсімдеуге көмектесемін деп сенімдеріне кіріп, өз аттарына ірі көлемде несие алғанын мәлімдеді.
Жәбірленушілердің айтуынша, несие сомасы 5 367 541 және 1 758 000 теңгені құраған. Тергеу барысында күдіктінің азаматтарға жеңілдетілген шарттармен несие алып беремін деп уәде беріп, құжаттарын пайдаланып, олардың атына несие рәсімдеп, қаражатты өз қажетіне жұмсағаны анықталды.
Қазіргі уақытта күдіктіге қатысты жаңа қылмыстық істер қозғалды. Тергеу оның алаяқтық әрекеттерінің 19 эпизодпен байланысты екенін дәлелдеді. Күдікті қамауда, тергеу амалдары жалғасуда.
