Алматы облысы Жер жанаты Жетісу Қазақстандағы ең тартымды туристік аймақтардың бірі саналады. Елдегі әрбір оныншы туристік нысан осы өңірде орналасқан. Бүгінде облыс шетелдік туристер ағымы бойынша Алматы және Астана қалаларынан кейін 3-орында тұр. Облыстағы туризм әлеуетінің дамуы туралы Алматы облысының әкімі марат Сұлтанғазиев Орталық коммуникациялар қызметі алаңында өткен брифингте мәлім етті.
Соңғы екі жылда Алматы облысына келушілер саны 2 есеге артыпты. Бұл көрсеткіш 2022 жылы – 848,5 мың адам болса, 2024 жылы – 1 809,9 мың адамға жеткен. Ал шетелдік туристер саны 128 мыңға жетіп, бұл көрсеткіш 2022 жылмен салыстырғанда 12 есе көп.
« Биыл Қытай туристері ағыны да айтарлықтай өсті: 2023 жылдың 11 айында – 7,6 мың адам, ал 2024 жылдың 11 айында – 11,3 мың адам.Туризмнің дамуына оқиғалық туризм ерекше ықпал етуде. Осы стратегия аясында Алматы облысында бірқатар ірі іс-шаралар ұйымдастырылды. Олар «Tengri Ultra» Ұлы дала марафоны, Іле-Балқаш регатасы, «Taklimakan Rally – 2024» автожарысы, «Race Nation Kazakhstan – 2024» жарысы»,- деді Марат Сұлтанғазиев.
Алматы облысы Көрікті Көлсай, Шарын шатқалы сынды туристік аймақтарымен танымал. Бұл өңірлерді көруге қызығушылық танытқандар отандық туризмді дамытуға айтарлықтай үлес қосуда. Бұл іс-шаралар жергілікті және шетелдік қонақтар үшін тартымды болып, өңірді танымал етуде. 2024 жылы жалпы құны 20 миллиард теңге болатын бірнеше туристік нысан іске қосылды.
Марат Сұлтанғазиев туризм саласын дамытуға бөлнетін инвестициялық жобаларға тоқталды. Ол:« Қара каньонда шыны көпір салу – 1,5 миллиард теңге, «Ой-Қарағай» шипажайын кеңейту – 58 миллиард теңге, Қонаев қаласында аквапарк және «DoubleTree by Hilton» қонақ үйінің құрылысы – жалпы сомасы 77,5 миллиард теңгеге жоспарланып отыр»,- деді.
Бұл жобалар Алматы облысының туристік тартымдылығын арттырып, мәдени және іскерлік байланыстарды нығайтуға, сондай-ақ жаңа мүмкіндіктер ықпа етеді. Туризмнің дамуымен облыс Қазақстандағы жетекші туристік орталықтардың біріне айналып келеді.
