Премьер-министрдің орынбасары Серік Жұманғарин доллардың қымбаттауы еліміздегі азық-түлік бағасына әсер етпейтінін айтты, деп хабарлайды alataunews.kz.
«Қазақстан әлеуметтік маңызы бар тауарлардың 10 түрі бойынша өзін толықтай қамтамасыз етіп отыр. Олардың қатарына ұн, тұз, күріш, макарон, май, картоп, қой еті, сиыр еті және сәбіз кіреді. Сонымен қатар, 14 тауар бойынша қамтамасыз ету деңгейі 80%-ды құрайды, ал 5 тауар түрі бойынша импортқа тәуелділік сақталып отыр. Мысалы, құс еті – 73%, шұжық өнімдері – 60%, балық – 60%, ірімшік пен сүзбе – 46%, ал қант – 44% деңгейінде қамтамасыз етілуде», – деді Серік Жұманғарин.
Вице-премьердің айтуынша, Қазақстанда өндірілмейтін апельсин, банан, лимон сияқты көкөніс пен жеміс түрлерінің бағасына қатысты тәуекелдер бар, бірақ олардың қымбаттауы айтарлықтай болмайды. Соңғы аптада дүкендердегі бағалар өзгеріссіз қалған.
«Елімізде өспейтін цитрус жемістерінің бағасы төмендеуі мүмкін. Қазіргі таңда Еуразиялық экономикалық комиссия (ЕЭК) осы өнімдерге кедендік әкелу бажын төмендету мәселесін қарастыруда. Бұл валюта бағамының әсерін азайтып, өнімдердің қолжетімділігін арттыруы мүмкін», – деді Жұманғарин.
Сонымен қатар, вице-премьер Қазақстанда жылыжай салумен айналысатын кәсіпорындарға жаңа шешімдердің қалай әсер ететінін ескеретінін айтты.
«Біз кәсіпкерлеріміздің қызметіне қысым көрсетпеуге тырысамыз. Егер бұл бағытта қауіп төнбейтініне көз жеткізсек, кедендік бажды азайту туралы шешім қабылдаймыз», – деп қорытындылады ол.
