Қытайда жаңа туристік бағыт – Тяньти Аспан сатысы ашылды. Ол Хунань провинциясындағы Чжанцзяцзе саябағындағы Цисин тауында орналасқан. Бұл ерекше маршрут саяхатшыларға елдің сұлулығын биіктіктен тамашалауға мүмкіндік береді. Алайда оның экстремалды сипаты бәріне бірдей қолайлы болмауы мүмкін, деп хабарлайды alataunews.kz.
Жаңа аттракцион – экстремалды ұнататындар үшін таптырмас демалыс. Ұзындығы 168 метр болатын бұл маршрут шамамен 1500 метр биіктікте орналасқан екі жартасты байланыстырады. Туристерге таңғажайып көріністер мен адреналинге толы әсер сыйлайтын бұл жол феррата стилінде салынған. Ол болат тұтқалармен, тірек орындарымен және сақтандыру тростарымен жабдықталған, бұл саяхатшыларға тік жартастарға қауіпсіз түрде көтерілуге мүмкіндік береді.
Тяньти сахатшылар арасында тез танымал болды. Мемлекеттік CCTV арнасының мәліметінше, Чжанцзяцзедегі Тяньти Аспан сатысын күн сайын 1200-ден астам адам тамашалайды. Бұл ерекше маршрутты сынап көргісі келетіндердің көптігі кейде жартастарда «кептелістер» тудырады, туристер ұзын-сонар кезекке тұруға мәжбүр.
Аттракционды ұйымдастырушылардың айтуынша, бұл маршрутпен үш сағаттық көтерілу құны 580 юаньды (шамамен 40 000 теңге) құрайды. Туристердің қауіпсіздігі үшін инструкторлар маршрут бойы бірге жүреді, саяхатшыларға шлемдер, сақтандыру белдіктері және рюкзактар беріледі.
