Отыз жыл ішінде екі ел арасында экономикалық және мәдени-рухани байланыстар орнығып үлгерді. Осы сапар аясында Бас консул Пак Нечхон бастаған делегация аудан халқымен, корей этносы өкілдерімен кездесті.
«Мен өз атымнан және Корея мемлекетінің атынан Қазақстан халқына рахмет айтамын. Біз Қазақстан Республикасын, соның ішінде Қаратал ауданы Үштөбе қаласын қасиетті де киелі аймақ, біздің алтын бесігіміз деп санаймыз. Өйткені бұл жер қиын-қыстау кезеңде туған жерінен Қазақстанға жер аударылған отандастарымызды қорғап, олардың өсіп-өркендеуіне көмегін тигізді. Екі ел арасындағы достық қарым-қатынас одан әрі нығая берсін», — деді Бас консул Пак Нечхон.
Кездесуге қатысушылар еркін пікір алмасып, жылы жүздесу жасады. Болат Керімбек те өз кезегінде ресми делегацияға лебіз-тілегін жеткізіп, ризашылығын білдірді. Қонақтарға корей этностының қолданбалы өнерінің көрмесі, ұлттық асханасы, ұлттық ойындары ұсынылып, гала концерт ұйымдастырылды.
Осы күні А. Пушкин атындағы мектеп ғимаратында кореялық «НЁНДЕ» клиникасы мен Чунан университетінің дәрігерлері қараталдықтар үшін ортопедия, травмотология, хирургия, нейрохирургия, неврология, алғашқы медициналық көмек бағыттары бойынша қабылдау жасады. Дәл осындай дәрігерлік кеңес беру шарасы Талдықорғандағы көп салалы ауруханада 5-9 тамыз аралығында да жүргізілген болатын.
Мерейлі жылға арналған шаралар легін Бастөбеде корей халқының атынан «Достық» монументі мен мемориалының салтанатты ашылуы түйіндеді. Осы арада мектеп оқушылары арасында «Достық» тақырыбында өткен байқаудың қорытындысы шығарылып, жеңімпаздары марапатталды.
