Аталған акцияға, alataunews.kz және «Өлке тынысы» ЖШС ұжымы да белсене атсалысты.
Наурыздың 14-і мен 23-і аралығындағы Наурызнама онкүндігі жаңа дәстүрлер енгізіп, мерекені идеологиялық мағынамен, әр күнін тақырыптық бағыттарымен толықтыруда. Осыған орай, бүгін «Жаңару» және «Тазару» күндері бағытында Алматы облысы бойынша жалпыұлттық сенбілік өтіп, 15 мың 850 ағаш отырғызылады.
«Наурыз жаңарудың, тазарудың бастамасы болғандықтан мұндай игі шараларды қолға алуды өз басым құптаймын. Десек те, сенбілік барысында жұртты тазалыққа шақырып, іске жұмылдыру қажет. Жұртшылық Наурыздың келе жатқанын мұндай игі істер арқылы сезіне түсер болса, онда бұл күні ертең Наурыздың насихатын арттыруға және Наурыз мерекесінің жалпыхалықтық сипат алуына ықпал етеді», — деп атап өтті «Өлке тынысы» ЖШС басшысының орынбасары Мұратбек Болатұлы.
Айта кетейік, бүгін Қазақстандағы Наурызнама онкүндігінің алтыншы күні — Жаңару күні. Бұл өткенді қайта қарап, болашаққа жоспар құру кезеңі.
