Соның нәтижесінде жаңа оқу жылында мемлекеттік тапсырыс негізінде білім алатын студенттер саны айтарлықтай азаюы мүмкін.
Ресми мәліметтерге сүйенсек, 2030 жылға дейін Қазақстан экономикасына шамамен 885 мың білікті маман қажет болады. Әсіресе, инженерлік салада қызмет ететін кадрларға сұраныс жоғары. Нақтырақ айтқанда, алдағы бес жылда елімізге 529 977 инженер маманы керек. Сонымен қатар, еңбек нарығында педагогтерге деген сұраныс та тұрақты түрде сақталмақ. Министрлік деректері бойынша, мұғалімдерге деген қажеттілік жалпы сұраныстың 21 пайызын құрап отыр. Бұл дегеніміз – кем дегенде 185 мың талапкер педагогика мамандығын таңдауы тиіс.
Алайда биыл 220 мыңға жуық талапкердің ішінен мемлекеттік грантқа тек 71 844 орын ғана бөлініп отыр. Салыстырмалы түрде алғанда, өткен жылы 112 мың талапкерге грант берілген еді.
Жаңа оқу жылында мемлекеттік тапсырыс аясында инженерлік, қайта өңдеу және құрылыс салаларына басымдық беріледі. Аталған салаларға 20 878 грант бөлінген. Педагогикалық бағыттағы мамандықтарға 17 898 грант қарастырылса, ақпараттық-коммуникациялық технологиялар саласына 12 087 грант бөліну жоспарланған.
Білім беру саласындағы бұл өзгерістер еліміздің еңбек нарығындағы сұранысты ескере отырып жасалып отыр. Дегенмен, талапкерлер үшін грант санының күрт азаюы оқу ақысына қатысты жаңа қиындықтарды тудыруы мүмкін.
