«Біз, Қазақстан халқы Ассамблеясының мүшелері, ҚР-дағы Украина елшісі Петр Врублевский мырзаның қазақстандық блогерлердің біріне берген сұхбатында айтқан сөздерін қатаң айыптаймыз және ондай сарындағы мәлімдемелерге жол беруге болмайды деп санаймыз. Бейбітшілік пен бірлік – біздің мемлекеттік саясаттың және қоғамдық бірігудің басты қағидасы. Сондықтан мұндай пікірді кім айтса да біздің қарсылығымызға ұшырайды», – делінген Ассамблея үндеуінде.
Ассамблея мүшелерінің мәліметінше, дипломатия – өшпенділік пен араздықты қоздыру үшін емес, бейбітшілік пен ынтымақтастық идеалдарына қызмет етуі тиіс. Қазақстанның біртұтас көпэтносты халқы үшін достық, өзара көмек және бейбітшілік қағидалары мызғымайтын ұстаным.
«Барлық қазақстандықты дұшпандық пен зұлымдықты насихаттайтын арандатуларға ермей, ұрпақтың бүгіні мен болашағы үшін елдегі бейбітшілік пен халық бірлігін сақтауға және нығайтуға шақырамыз», – деп жазылған үндеуде.
Естеріңізге сала кетсек, Украина елшісі Диас Құзайыровқа берген сұхбатында: «Шамамыз келгенше көбінің көзін жоюға тырысамыз. Қазір орыстарды көбірек өлтірсек, біздің балаларымыз оларды өлтіруге көп күш жұмсамайтын болады», – деп мәлімдеген еді.
