Қазақстандықтар цифрлы құжаттарынан туған күндерінің қате жазылғанын байқап, жаппай шағымданып жатыр. Енді eGov порталы немесе басқа да қосымшалардан цифрлі құжатыңызды ашсаңыз, сіздің шын туған күніңізді емес, одан бір күн бұрын туылғаныңызды көрсетіп тұр. Осылайша жаңа уақыт белдеуіне ауысу қазақстандықтарды бір күнге ерте қартайтып жіберді.
eGov сайты немесе қосымшасынан өздеріңіздің цифрлық құжаттарыңызды тексеріңіздер. Егер туған күніңіз дұрыс емес болса, құжатты жаңартып көріңіз. Бұл көмектесуі мүмкін.
Ұлттық ақпараттық технологиялар АҚ-ның мәліметінше, қазір мамандар бұл мәселемен айналысып жатыр екен. Себебі анықталған соң, жауап беретіндерін айтты.
Айта кетейік, Kaspi.kz және Halyk сияқты банк қосымшаларында мемлекеттік қызметтер бөліміндегі цифрлық құжаттар мүлдем ашылмайды. Оған себеп, мемлекеттік органда жүргізіліп жатқан техникалық жұмыстар делінген.
Еске салайық, 29 ақпаннан 1 наурызға қараған түні сағат 00:00-де Қазақстанның 3 қаласы мен 12 облысы уақытты бір сағатқа кері шегеріп, жаңа уақыт белдеуіне (-UTC+5) көшті. Енді бүкіл Қазақстан бір уақыт белдеуінде өмір сүреді.
