18 қыркүйекте Ұлттық қауіпсіздік комитеті ІІМ және Бас прокуратурамен бірлесіп, Астана, Алматы, Шымкент қалаларында және Ақтөбе, Атырау, Алматы, Жетісу, Батыс Қазақстан және Павлодар облыстарында ұйымдасқан қылмыстық топ мүшелерін ұстауға бағытталған арнайы операция өткізді, деп хабарлайды alataunews.kz.
Операция нәтижесінде 50 адам ұсталып, ішкі істер органдарына жеткізілді. Қазіргі уақытта оларға қатысты тергеу амалдары жүргізілуде. Бұл топ аса ірі көлемде тауарлар мен автокөліктерді ұрлау, сондай-ақ ұйымдасқан қылмысты қаржыландыру әрекеттеріне қатысы бар деген күдікке ілінді.
Қылмыстық топ шамамен 2 миллиард теңгеден астам мүлік ұрлап, 20-дан астам адамның сеніміне кірген. Топтың ішінде нақты иерархия мен рөлдер бөлінген, құрамында қылмыскерлер мен деструктивті діни ортаның өкілдері, сонымен қатар түзеу мекемелеріндегі жазасын өтеушілер болған.
Тінту барысында банк карталары, ірі көлемдегі қаражат, экстремистік әдебиеттер және басқа да тергеуге қажетті заттар тәркіленді.
Қылмыстық-процестік кодекстің 201-бабы 1-бөлігіне сәйкес, қосымша ақпарат жарияланбайды.
