Отырыста «Әділ сөз» сөз бостандығын қорғау қорының директоры Қарлығаш Жаманқұлова отандық БАҚ-ты қолдауды күшейтіп, салалық заң жобасына өзгерістер енгізуді ұсынды.
«Қазіргі таңда сырттан келетін ақпарат көлемі күн сайын артып келеді, ал адамның оны толық түсініп, сараптау мүмкіндігі шектеулі. Сондықтан қоғамдағы оқиғалардың нарративін өзіміз айқындай алуымыз қажет. Түсіндіру логикасын өзгелер емес, өзіміз белгілеуіміз маңызды. Сонымен қатар медиасауаттылықты жүйелі түрде күшейту қажет. Медиасауаттылық – қоғамды сыртқы ақпараттық манипуляциялар мен қауіп-қатерлерден қорғаудың тиімді құралы. Медиа сауаты бар азамат әлеуметтік желілердегі жалған ақпаратқа тәуелді болмайды» — деді Қарлығаш Жаманқұлова.
Оның айтуынша, отандық бұқаралық ақпарат құралдары мен кәсіби журналистиканы қолдау аса маңызды.
«Шынайы әрі сапалы ақпаратқа деген сұраныс азайған жоқ. Отандық БАҚ бірқатар қиындықтарға қарамастан өз жұмысын абыроймен жалғастырып келеді. Осы орайда, Президент мырза, БАҚ-ты қолдауыңызды сұраймын» — деді Қарлығаш Жаманқұлова.
«Әділ сөз» сөз бостандығын қорғау қоғамдық қорының президенті Қарлығаш Жаманқұлова қоспалаталы жүйеден бір палаталы модельге көшу мәселесі аясында партиялық тізімдердегі әйелдер квотасын сақтап қалу жөнінде жеке өтініш білдірді.
«Партиялық-саяси жүйе аясында тиісті заңнамалық реттеу қажеттігін өзіңіз де ұсындыңыз. Әйелдердің заң шығарушы органдардағы тұрақты қатысуы қабылданатын шешімдердің сапасын арттырып, күн тәртібін кеңейтеді. Осыған байланысты 2022 жылы Сіздің (президент- автор) бастамаңызбен қолға алынған саяси жүйені жаңарту қағидаттарының сабақтастығы мен институционалдық нығаюы аясында әйелдер квотасын 30 пайыз деңгейінде норма ретінде сақтауды сұраймын», — деді Қарлығаш Жаманқұлова.
Сондай-ақ ол журналистердің тиімді жұмыс істеуіне мүмкіндік беретін заң жобасын жеңілдетуді сұрады.
«Қылмыстық кодекстің 158-бабы журналистердің құқықтарын толық көлемде қорғай алмай отыр. Осыған байланысты құқық бұзудың бір бөлігін әкімшілік жауапкершілік санатына көшіруді ұсынамыз. Бұл журналистердің кәсіби қызметін неғұрлым тиімді қорғауға мүмкіндік береді», — деді ол.
