Кеңеске қатысқан Еңбек және халықты әлеуметтік қорғау министрі Светлана Жақыпова әлеуметтік саладағы цифрландыру барысында анықталған заңбұзушылықтарды тізіп берді.
Министрдің айтуынша, қазіргі уақытта Бірыңғай цифрлық платформаны (БЦП) енгізу жұмыстары жүріп жатыр. Денсаулық сақтау, білім, мәдениет және спорт салаларындағы 16 ұйым цифрландырылған. Шілдеден бастап 9 мыңнан астам мекеменің штаттық кестелері декларациядан өтіп, бұл жұмыс жыл соңына дейін толық аяқталмақ.
Жақыпованың айтуынша, цифрлық жүйе көптеген күмәнді схемаларды анықтауға мүмкіндік берген. Мәселен, 40 мыңға жуық азаматқа ресми еңбек шарты болмағанына қарамастан, зейнетақы жарналары аударылып отырған. Кейбір қызметкерлер қағаз жүзінде бір аймақтағы мектептің штатында болса да, басқа өңірлердегі ұйымдарда да еңбек шартына отырған болып шығады. Осы деректердің барлығы бойынша мемлекеттік еңбек инспекциясы тексеру жұмыстарын бастады.
Бұдан бөлек, кадрлық үдерістерді автоматтандыру нәтижесінде 9,6 мың мектептің штат кестесінде көрсетілмеген, бірақ басшылар тарапынан өз бетінше енгізілген 75 лауазым анықталған.
«Олардың қатарында мектепке қабылдау жөніндегі директордың орынбасары, атқарушы директор секілді штатта болмауы тиіс лауазымдар бар. Осыған байланысты Тізілімді бірыңғай стандартқа келтіру жұмыстары басталды», – делінген Үкімет хабарламасында.
