Құжат Қазақстан Республикасы Конституциясының 44-бабының 21) тармақшасына сәйкес мемлекеттік басқару жүйесінің тиімділігін арттыруға бағытталған.
Жарлыққа сәйкес, Қазақстан Республикасының Ұлттық қауіпсіздік комитетіне Жасанды интеллект және цифрлық даму министрлігінің ақпараттық-коммуникациялық инфрақұрылымның аса маңызды объектілерінің ақпараттық қауіпсіздігі бөлігінде ақпараттандыру саласындағы мемлекеттік бақылауды жүзеге асыру жөніндегі функциялары мен өкілеттіктері берілді.
Сондай-ақ Ұлттық қауіпсіздік комитеті аталған функциялар мен өкілеттіктерге сәйкес Жасанды интеллект және цифрлық даму министрлігінің құқықтары мен міндеттемелерінің құқықтық мирасқоры болып айқындалды.
Осыған байланысты Үкіметке ҰҚК-мен бірлесіп, заңнамада белгіленген тәртіппен:
қажетті заңнамалық түзетулерді әзірлеу;
жарлықты іске асыруға бағытталған өзге де шараларды қабылдау тапсырылды.
Сонымен қатар құжатта Ұлттық қауіпсіздік комитетіне «Қазақстан Республикасының Ұлттық қауіпсіздік комитеті туралы ережеге өзгерістер мен толықтырулар енгізу туралы» Президент жарлығының жобасын Мемлекет басшысының қарауына енгізу міндеті жүктелгені атап өтілген.
Жарлықтың орындалуын бақылау Қазақстан Республикасы Президентінің Әкімшілігіне жүктелді. Құжат қол қойылған күнінен бастап күшіне енеді.
