Ведомство мәліметінше, соңғы уақытта әлеуметтік желілерде, әсіресе Threads платформасында «жар іздеймін», «танысқым келеді» деген сипаттағы жазбалар жиі кездеседі. Алайда мұндай хабарландырулардың артында қарапайым қолданушылармен қатар алаяқтар да болуы мүмкін.
ІІМ дерегінше, интернет-алаяқтар көбіне өздерін тартымды жігіт немесе қыз ретінде таныстырып, адаммен белсенді хат алмасады. Олар қысқа уақыт ішінде ерекше көңіл бөліп, сенімге кіруге тырысады. Кейіннен әңгіме қаржылай көмек сұрауға ұласуы мүмкін.
Алаяқтық схема әдетте мынадай кезеңдермен жүреді:
-
белсенді қарым-қатынас орнату және эмоциялық тәуелділік қалыптастыру;
-
өмірдегі қиын жағдайлар, ауру немесе шұғыл шығындар туралы айту;
-
тиімді инвестиция ұсынып, ақша аударуды сұрау;
-
қаражатты криптоәмияндарға немесе үшінші тұлғалар арқылы жіберуді өтіну;
-
ақша алғаннан кейін байланысты үзіп, жәбірленушіні бұғаттау.
Министрлік егер экранның арғы жағындағы адам сізден ақша сұраса, бейнебайланыстан немесе жеке кездесуден қашса, интернеттегі басқа фотосуреттерді пайдаланса сақ болған жөн екенін атап өтті.
Алаяқтардың құрбаны болып қалмау үшін ІІМ мынадай кеңестер береді:
-
интернет арқылы танысқан адамдарға ақша аудармау және жеке деректерді бермеу;
-
жеке фотосуреттерді жібермеу;
-
күмәнді сілтемелерге өтпеу;
-
сұхбаттасушының профилі мен ақпаратын тексеру;
-
күмән туындаған жағдайда әңгімені тоқтату.
ІІМ-нің киберқылмысқа қарсы іс-қимыл департаменті қазақстандықтарды онлайн танысу кезінде барынша сақ болуға және құқыққа қайшы әрекеттер байқалған жағдайда полицияға уақытында хабарлауға шақырды.
