«Филип Моррис» сот алдында жауап береді. Алматы облысының мамандандырылған экономикалық соты аталған ұйымның қыздырылатын темекіні тұтынуға арналған затқа ашық жарнама жариялайтыны және темекіні ел арасында танымал етуге бағытталған iqos_kaz инстаграм аккаунтын бұғаттау және әлеуметтік желіден біржолата жою туралы жазылған біздің талап-арызымызды қабылдады», — деп жазды «Темекі түтінінен азат Қазақстан үшін» ұлттық коалациясының көшбасшысы Жәмила Садықова өзінің Facebook парақшасында.
Оның айтуынша, IQOS-ты өндіруші Америка 2020 жылдан бастап күшіне енген заң бойынша Қазақстанда темекіні, темекіге теңестірілген затты жарнамалауға болмайтынын білетін көрінеді.
«Олар өз істерінің заңға томпақ келетінін жақсы түсінеді. Бірақ, жылына 9 млрд доллар пайда көріп отырған компания қай-қайдағы «СТАН»-ның тәртібіне бағынсын ба? Керек десеңіз, пысқырып та қарамайды. Олар біздің елді табыс көзіне айналдыру үшін ғана жүр, «стандықтардың» пікірін тыңдау үшін емес. Филип Морристің басшысы және ғалымы Жизель Бакер біздің ескертпемізді естіді. Естіді де, қыңқ етпеді. Олардың аккаунты өте танымал. Қазақстандық блогерлер жасөспірімнің қылығын жасап жүр. Бұл инстаграм парақшасында қазақстандық поп музыка өнерінің жұлдыздары бой көрсетті, ғалымсымақ Смаилов та IQOS-ты жарнамалады. Түсірілім тіпті керемет, сапалы, әдемі. Өздерін әрі өзгені жарнамалауда бұлар алдына жан салмайтын болып тұр ғой», — деп жалпақ жұрттың жанашыры ұйым жайлы айтты.
Алдағы уақытта Жәмила Садықованың сенімді серігіне айналған спикерлер сот процессінің қалай жүргізіліп жатқандығы жайлы ақпаратпен бөлісетін болады.
