2024 жылғы су тасқынынан зардап шеккен кәсіпкерлерге өтемақы төлеу үшін Үкімет резервінен 12,1 млрд теңге бөлінді, деп хабарлайды alataunews.kz.
Экономика министрлігінің мәліметінше, 1 қазанға дейін шағын және орта кәсіпкерлік субъектілерінен 15 млрд теңге сомасына 764 өтінім түскен. Оның ішінде шамамен 12 млрд теңгені құрайтын 630 өтінім бойынша оң шешім шығарылып, 10,1 млрд теңгеден астам сомаға 615 өтінім толық қанағаттандырылды.
30 өтінім бойынша өтемақы төлеуден бас тартылды. Қалған зардап шеккен объектілер бойынша бағалау және сметалық жұмыстар жалғасуда, олар аяқталған соң өтінімдер өңірлік комиссиялардың қарауына ұсынылады.
Өтінімдердің көпшілігі Атырау (423 өтінім) және Солтүстік Қазақстан (107 өтінім) облыстарынан түскен. Сонымен қатар, Батыс Қазақстаннан 87, Қостанайдан 68, Ақтөбеден 51 және Ақмоладан 28 өтінім келіп түсті.
