Екі елдің көшбасшылары келіссөздер жүргізеді, сондай-ақ ынтымақтастық туралы келісімдер жасау жоспарланып отыр. Айбек Смадияров атап өткендей, бұл ҚХР басшысының пандемия басталғаннан бергі алғашқы шетелдік сапары. Си Цзиньпин 2020 жылдың қаңтар айынан бастап Қытайдан сыртқа шықпады.
Қытай басшысының күзде Қазақстанға сапарлайтыны биыл жаздың басында белгілі болды. 7 маусым күні Қазақстан Президенті Қасым-Жомарт Тоқаев Қытайдың сыртқы істер министрі Ван Иді қабылдап, күзгі сапар сол кезде хабарланған. Жапондық БАҚ Си Цзиньпиннің пандемияға байланысты Владимир Путиннің Ресейге шақыртуынан бас тартқанын жазды. Кремль мұны жоққа шығарды, ҚХР Төрағасы коронавирустық шектеулер жойылғаннан кейін Ресейге бара алады деп мәлімдеді.
Ал Ресей президенті Владимир Путин Қазақстанға қазан айында Азиядағы өзара іс-қимыл және сенім шаралары жөніндегі кеңеске және ТМД саммитіне қатысу үшін келеді. Бұл туралы Ресей президентінің халықаралық істер жөніндегі көмекшісі Юрий Ушаков айтты.
«Нұр-Сұлтанда өтетін Азиядағы өзара іс-қимыл және сенім шаралары жөніндегі Кеңеске Президентіміздің қатысуы қаралып жатыр. Сондай-ақ Нұр-Сұлтанда ТМД саммиті өткізіледі. Бұл қазан айының ортасына дәлірек айтсақ, 12-14 қазанға келеді», — деді Ушаков журналистерге.
