«Жыл бойы адал еңбек етіп жүрген азаматтарды елдің шетінде, желдің өтінде қалдырмай әркез осылай қолдау көрсетуіміз қажет. Жайлауда мұндай мереке өтпегелі біраз уақыт болыпты. Сондықтан өздеріңізбен жүздесіп, пікір-кеңестеріңізді тыңдайық деп мерекелік шара өткіздік. Әрқашан еңбектеріңіз жемісті болсын», — деді аудан әкімі Марат Сағымбек.
Малшыларға баспаналы болуға көмектескен жеке шаруа қожалықтың басшылары, кәсіпкерлер малшылар қауымына бұдан басқа да ақшалай сертификаттар табыстады.
Сондай-ақ, малшы қауымның бірқатары «Ауыл еңбегі үшін» арнайы төсбелгісімен марапатталды. Енді біріне ер-тұрман, жәдігерлер сыйға тартылды.
Соның бірі 87 жастағы Тұрлыбай Шаукеев ата. Өмірінің 50 жылдан астамын осы Белжайлаудың төрінде өткізген малшы қария осы күніне шүкіршілік айтады.
«6 баламды осы малмен асырадым. Барлық бала-шағама баспана, көлік алып бердім. Малдың берекесі бар. Осы жайлау менің өмірім. Мұндай той жиі өткені дұрыс. Медаль алып жатырмын. Өте қуаныштымын. Мал шаруашылығы бабадан келе жатқан кәсіп. Жастар осы кәсіпке түгелдей бет бұрса деймін», — деді ақсақал.
Бүгінде ауданда 105 611 бас ірі қара, 379 458 қой-ешкі, 22 535 жылқы және 370 бас түйе бар.
