Блогер түсірген бейнероликтердің бірінде ол жолдасының қалтасынан ұялы телефонды ұрлағандай етіп, оны өтіп бара жатқан Қытай азаматына берген. Артынша, ұрлық болды деп сол адамға кінә таққандай әрекет жасаған.
Тағы бір видеода ол метро мен көшеде бейтаныс ер адамдардың қолын, тізесін ұстаған. Бұл әрекеттер қоршаған адамдар арасында үрей мен түсініспеушілік туғызған.
Түсіндіру жұмыстары барысында блогер өз әрекетін қателік деп танып, өкінішін білдірді.
«Менің видеом ешкімді ренжіту мақсатында түсірілмеді. Бұл – ойланбай жарияланған материал. Егер біреуге жағымсыз әсер етсе, кешірім сұраймын. Енді контент жариялау мәселесіне мұқият қараймын», – деді ол.
Полиция өкілдері әлеуметтік желілерде жарияланатын кез келген материалда өзгелердің ар-намысы мен құқықтары сақталуы тиіс екенін ескертті.
«Мұндай әрекеттер арандатушылық ретінде қабылданып, қоғамда теріс пікір тудыруы мүмкін», – делінген хабарламада.
Сонымен қатар, шетелге шыққан әрбір азамат сол елдің заңдары мен қоғамдық тәртіп ережелерін, мәдени дәстүрлерін құрметтеуі тиіс. Бұл талаптарды елемеу құқықтық жауапкершілікке әкелуі мүмкін.
Аталған жағдай қоғамда шетелдегі қазақстандық азаматтардың жүріс-тұрысы мен әлеуметтік желідегі жауапкершілігі туралы жаңа талқылауларға себеп болды.
