Қатты жел мен ыстық ауа райы жұмысты қиындатып жатыр. Қостанай облысындағы тілсіз жаумен мамандар үш тәуліктен бері алысып әлек.
ҚР Орман шаруашылығы және жануарлар дүниесі комитетінің мәліметінше, Қостанай облысында өрт аумағы 5 қыркүйектегі жағдай бойынша 43 мың гектардан асты. Тілсіз жауды ауыздықтауға 2 193 адам жұмылдырылды. 224 техника, 7 әуе кемесі, 5 өрт сөндіру пойызы жеткізілген.
ТЖ басталған сәттен бастап Қостанай облысының төрт ауылының, атап айтқанда Озерное, Аманқарағайдың солтүстік бөлігі, Калинино, Лесноеның 1 841 тұрғыны эвакуацияланды. Желдің күшеюіне байланысты орман өрті Бағаналы ауылын жайлай бастады. Ауылды қорғау мақсатында басқа учаскелерден күштер мен құралдар жедел жеткізілді.
Қазіргі уақытта екі өрт ошағы жанып жатыр. Жергілікті атқарушы органдар Бағаналы ауылынан 11 адамды, оның ішінде 2 баланы Қазанбасы ауылына жеткізді. Оқиға орнында ТЖМ 10 бірлік техника, жеке құрамнан 52 адам, 4 әуе кемесі (ТЖМ-3, ҚМ-1), ЖАО 5 бірлік техника, 14 адам, ҚМ 9 бірлік техника, ҰҰ 400 адам жұмыс жасап жатыр. Қатты жел мен ыстық ауа райы жұмысты қиындатып жатыр. «Қазгидромет» РМК деректері бойынша, 5 қыркүйекте Қостанай облысы Әулиекөл ауданының аумағында жоғары температура 31 градусқа дейін сақталады, желдің жылдамдығы 7 м/с дейін жетеді.
Қостанай облысында орман өрттері фактілері бойынша Қылмыстық кодекстің 341-бабы «ормандарды жою немесе бүлдіру» және 204-бабының 2-бөлігі «бөтен мүлікті абайсызда жою немесе бүлдіру» бойынша қылмыстық істер қозғалды.
