Іс-шара барысында облыс тұрғындарының кәсіби жетістіктері, әлеуметтік-экономикалық дамуға қосқан үлесі мен адам капиталының өсуіне ықпал еткен еңбегі атап өтілді. Алматы облысының әкімі Марат Сұлтанғазиев құттықтау сөзінде әр сала өкілдерінің өңір дамуы үшін маңызын ерекше атап өтті.
«Спортшылар жеңістері арқылы облыстың беделін арттырады, журналистер қоғам мен билік арасындағы ашық диалогты қамтамасыз етеді, ал жастар жаңа бастамалар мен тың идеяларды ұсынады. “Хан Тәңірі”, “Самғау” және “Заңғар” – кәсібилік пен табандылыққа көрсетілген құрмет», – деді өңір басшысы.
Спорт саласында «Хан Тәңірі» премиясы аясында жоғары нәтижелерге қол жеткізген және спорттың дамуына үлес қосқан 152 спортшы қаржылай сыйлықпен марапатталды. Бокс бойынша әлем чемпионатының жүлдегері Ертуған Зейнулинов бұл марапат алдағы жетістіктерге ынталандыратынын айтты.
Үш жылдық үзілістен кейін қайта жаңғырған «Самғау» медиа-премиясы аймақтағы журналистиканы қолдаудың маңызды тетігіне айналды. Байқауға баспа және электронды БАҚ, телеарналар, цифрлық платформалар мен блогерлер қатысты. «Жылдың үздік журналисі» аталымын «Огни Алатау» газетінің тілшісі Жанар Мықтыбаева иеленді.
Сондай-ақ «Үздік дизайнер» аталымы Адина Байбакқа, «Жылдың үздік медиаменеджері» атағы «Өлке тынысы» компаниясының директоры Кәдірбек Құныпияұлына табысталды. Лауреаттар қатарында «Алатау Арайы» газеті, Alatau News сайты және «Жетісу» телеарнасы бар.
Жастарға арналған «Заңғар» сыйлығы 14 пен 35 жас аралығындағы белсенді азаматтарға берілді. Жеңімпаздарға дипломдар мен 500 мың теңгелік сертификаттар табыс етілді. «Үздік жас журналист» атанған Alataunews.kz агенттігінің тілшісі Балнұр Асанова бұл марапат жастарды қолдауға бағытталған саясаттың нәтижесі екенін атап өтті.
Бірлескен марапаттау рәсімі спорт, медиа және жастар саласындағы үздіктерге көрсетілген қолдаудың айқын көрінісі болды.
