Қазіргі таңда қала аумағында 6 коммуналдық жағажай жұмыс істейді (№1, 2, 3, 5, 6, 7). Олардың біреуі шағын көлемді кемелерге арналған айыппұл тұрағы ретінде пайдаланылмақ.
№5 жағажай өткен жылы толық абаттандырылып, пайдалануға берілді. Жоба екі кезеңде жүзеге асырылды. Алғашқы кезеңде 120 мың шаршы метр аумақ ретке келтіріліп, балалар және спорт алаңдары, ойын аймақтары, балалар бассейні, жарықтандыру бағаналары мен шағын сәулеттік нысандар орнатылды. Сонымен қатар инженерлік желілер тартылып, пирс, санитарлық тораптар, демалыс орындары (шатырлар мен шезлонгтар), сондай-ақ жағажай волейболына арналған алаң салынды.
Екінші кезеңде «Freedom Holding Corp.» акционерлік қоғамы 950 метр жағалау аумағын абаттандырды. Бұл жерде жаяу жүргіншілер жолы мен веложолдар, спорт алаңдары, арт-нысандар, әткеншектер мен субұрқақтар орнатылып, жағалау толықтай жарықтандырылды.
Қазіргі уақытта №6 және №7 жағажайларды жаңғырту жұмыстары басталған. Жоба аясында визит-орталық салу, 54 коммерциялық павильон (оның ішінде 2 инклюзивті нысан), 450 демалыс орны, 9 санитарлық торап, 5 құтқару бекеті және 17 бейнебақылау камерасын орнату жоспарланып отыр.
Жағажай аумағындағы коммерциялық нысандарды сенімгерлік басқаруға алған коммуналдық кәсіпорын арқылы жалға беру көзделген.
Қала әкімдігі жағажайларды абаттандыру жұмыстары кезең-кезеңімен жалғасатынын атап өтті.
