Қазақстан Республикасы Сыртқы істер және Ішкі істер министрліктерінің бірлескен бұйрығымен шетелдіктер мен азаматтығы жоқ адамдар үшін шақыру рәсімдері, виза беру және келісу, виза мерзімдерін ұзарту немесе қысқарту ережелеріне өзгерістер енгізілді, деп хабарлайды alataunews.kz.
Енді визаның санаты, мәртебесі, қолданылу мерзімі, сондай-ақ қажетті құжаттар жаңа редакцияда айқындалады. Визалар бір мәртелік және көп мәртелік болып екіге бөлінеді, олардың әрқайсысына сәйкес Қазақстанға кіру, шығу және болу талаптары белгіленген. Виза алушыларға арналған шақыруларды рәсімдеу тәртібі де жаңартылды, соның ішінде жеке істер бойынша шақырулар мен шақыру құжаттарын ұсыну шарттары нақтыланды.
Сонымен қатар, виза рәсімдеуге қажетті құжаттар мен олардың тексерілу тәртібіне өзгерістер енгізілді. Әртүрлі санаттардағы визаларды алу үшін талап етілетін қосымша құжаттардың тізімі толықтырылды, мысалы, инвесторлар мен іскерлік сапар үшін келісімшарт көшірмесі қажет болуы мүмкін.
Жаңа бұйрық 2024 жылдың 17 қарашасынан бастап күшіне енеді.
