2024 жылғы 29 тамызда Қаржы министрі соттан тыс банкроттық рәсімін қолдануға қатысты мемлекеттік қызмет көрсету ережелері мен нысанына өзгерістер енгізді, деп хабарлайды alataunews.kz.
Бұл қызмет Қазақстан азаматтарына екінші деңгейлі банктер, бейрезидент банктердің филиалдары, микроқаржы ұйымдары немесе коллекторлық агенттіктер алдындағы қарыз міндеттемелерін тоқтату үшін ұсынылады. Сондай-ақ, бұл рәсім лицензиясынан айырылған, таратылған немесе таратылу сатысында тұрған банктер мен қаржы ұйымдары алдындағы қарыздарды қамтиды.
Борышкер соттан тыс банкроттық рәсімін қолдану үшін өтініш берген кезде, оның банктер, микроқаржы ұйымдары немесе коллекторлар алдында айлық есептік көрсеткіштің 1600 еселенген мөлшерінен аспайтын қарызы болуы, сондай-ақ меншік құқығында мүлкі болмауы және 12 ай бойы қарызды өтемеген болуы керек.
Соттан тыс банкроттық рәсімі өтініш беру күнінен бастап алдыңғы 7 жыл ішінде қолданылмаған жағдайда ғана мүмкін. Алайда, егер өтініш беруші соңғы 6 ай ішінде әлеуметтік көмек алушы болса немесе қарыз өтелмеген мерзім 5 жылдан асса, өтініш беру шарттарына қарамастан рәсімге өтініш беруге рұқсат етіледі.
Өтінішті қабылдау мемлекеттік корпорация, egov.kz электрондық үкімет порталы немесе мобильдік қосымша арқылы жүзеге асырылады. Өтініш автоматты түрде өңделіп, қажетті мәліметтер тіркеуші органдар мен кредиттік бюролардың деректеріне негізделіп тексеріледі.
