2023 жылғы 1 қыркүйектегі мәліметке сәйкес, Қазақстан аумағында жергілікті атқарушы органдардың рұқсатымен 14 346 шетелдік азамат жұмыс істейді, деп хабарлайды alataunews.kz.
Шетелдік жұмыс күшін тартуға берілген рұқсаттар келесі санаттарға бөлінеді: басшылар мен олардың орынбасарлары үшін 577 рұқсат (бірінші санат), құрылымдық бөлімшелердің басшылары үшін 2 591 рұқсат (екінші санат). Шетелдік жұмыс күшінің басым бөлігі үшінші (мамандар) және төртінші (білікті жұмысшылар) санаттарға жатады, олардың саны сәйкесінше 5 190 және 636 адамды құрайды. Сонымен қатар, маусымдық жұмыстарға 1 924 адам тартылса, корпоративтік ауыстыру аясында 3 428 адам жұмыс істейді. Қазіргі уақытта Қазақстанда шетелдік жұмыс күшін пайдаланатын 1 812 жұмыс беруші бар. Бұл кәсіпорындарда 391,7 мыңнан астам қазақстандық азамат жұмыс істейді, бұл жалпы қызметкерлер санының 96,8 пайызына тең.
Экономикалық қызмет түрлері бойынша шетелдік жұмысшылардың көпшілігі құрылыс саласында – 4 905 адам, ауыл, орман және балық шаруашылығында – 1 870 адам, әкімшілік және көмекші қызметтер саласында – 1 503 адам, тау-кен өндіру және карьерлерді қазу саласында – 1 361 адам, өңдеу өнеркәсібінде – 1 337 адам жұмыс істейді.
Еңбек мигранттары негізінен Қытай (3 267 адам), Өзбекстан (2 080 адам), Түркия (946 адам) және Үндістан (885 адам) елдерінен келеді.
