Қазақстан Республикасының Президенті жанындағы Қазақстан стратегиялық зерттеулер институтының тапсырысы бойынша «Демократия институты» қоғамдық қоры 2024 жылдың 18 тамызы мен 17 қыркүйегі аралығында әлеуметтанулық зерттеу жүргізді. Сауалнамаға 18 жастан асқан 8 мың респондент қатысты, деп хабарлайды alataunews.kz.
XXI ғасырда энергетика экономикалық тұрақтылыққа, қоршаған ортаға және халықтың өмір сүру сапасына әсер ететін негізгі факторлардың біріне айналды. Қазақстан уран қорына бай ел ретінде электр энергиясы тапшылығы мәселесін шешу мақсатында АЭС салу мәселесін қарастыруда.
Сауалнама нәтижелері бойынша респонденттердің 59,2%-ы референдумда дауыс беруге дайын екенін мәлімдеді, олардың 41,6%-ы өз шешіміне нық сенімді. Қызығы, бұл электоралдық белсенділік деңгейі тамыз айында өткен сауалнама нәтижелерімен бірдей, ол кезде де қатысу ықтималдығы 59,0% болған.
Респонденттердің әрбір бесіншісі әлі нақты шешім қабылдамаған болса, 17%-ы референдумға қатыспайтынын айтты. Сауалнама қорытындылары қазақстандықтарды ең алдымен АЭС-тің адам денсаулығына және қоршаған ортаға әсері толғандыратынын көрсетті. Бұл нәтижелер үкімет, сарапшылар және қоғам арасында ашық диалог жүргізудің маңыздылығын көрсетеді. АЭС құрылысы техникалық жоба ғана емес, сондай-ақ азаматтардың белсенді қатысуын талап ететін әлеуметтік маңызы бар жоба болып табылады.
Сауалнама 2024 жылдың 18 тамызы мен 17 қыркүйегі аралығында «Демократия институты» қоғамдық қорының тапсырысы бойынша жеке сұхбат (face-to-face) әдісімен жүргізілді. Зерттеуге Астана, Алматы, Шымкент қалалары мен 17 облыстан 18 жастан асқан респонденттер қатысты. Іріктеме көлемі 8 000 адамды құрады.
Статистикалық қателік деңгейі 2,9%-дан аспайды.
Орталық сайлау комиссиясының ресми мәлімдемесі: № 3Т-2024-05252505, 2024 жылғы 13 қыркүйек.
Сауалнама барысында респонденттерге «АЭС құрылысы туралы қандай ақпарат сіз үшін маңызды?» деген сұрақ қойылды. Жауап бергендердің 49,5%-ы «халық денсаулығына әсері» деп жауап берсе, 42,9%-ы «қоршаған ортаға әсері» деген нұсқаны таңдады. Сонымен қатар, 22,8%-ы «апаттар мен төтенше жағдайлардың алдын алу шаралары» деген жауапты таңдады.
