Бұл туралы Премьер-министрдің орынбасары Ермек Көшербаевтың депутаттық сауалға берген ресми жауабында айтылды.
Күзетшілерге қандай талаптар қойылады?
Премьер-министрдің тапсырмасымен күзет қызметтерін сатып алуға арналған типтік конкурстық құжаттама әзірленген. Онда күзетшілерді іріктеу бойынша нақты талаптар мен кәсіби біліктілікке қатысты шарттар көрсетілген. Атап айтқанда:
-
күзетшілердің жасы — 25 пен 50 жас аралығында болуы тиіс;
-
арнайы кәсіби дайындықтан өткен болуы қажет;
-
қару алып жүруге және пайдалануға лицензиясы болуы шарт;
-
сотталмаған болуы міндетті;
-
жеке кеңсесі болуы қажет;
-
жедел әрекет етуге қабілетті кемінде екі мобильді тобы болуы тиіс.
Сонымен қатар еліміздегі мектептерде төтенше жағдай кезіндегі әрекет ету алгоритмдері бекітілді. Жылына кемінде екі рет міндетті түрде теориялық және практикалық оқыту сабақтары ұйымдастырылады. Бұл іс-шараларға Төтенше жағдайлар және Ішкі істер министрліктерінің мамандары да қатысады.
Балалардың қауіпсіздігі қалай қамтамасыз етіледі?
Үкіметтің мәліметінше, бүгінде еліміздегі 6 600 балабақша, 6 600 мектеп және 700 колледж қауіпсіздік жүйелерімен жабдықталған. Сонымен қатар бұл мекемелерге лицензияланған күзет ұйымдары тартылған. Қазіргі таңда 6 900-ден астам білім беру нысанында арнайы күзет қызметі жұмыс істейді.
Оған қоса, мектептер мен балабақшаларда полицияның Жедел басқару орталықтарымен тікелей байланыстағы цифрлық бейнебақылау камералары орнатылған. Бейнематериалдар 30 тәулікке дейін сақталады. 2022 жылдан бері 20 мыңнан астам білім беру ұйымында осындай 220 мыңнан аса камера іске қосылған.
