Қапшағай жағажайындағы әжетхана мәселесі бірді-екілі емес, келушілердің барлығын мазалайтын сұрақ. Әжетхананың қайда екенін сұрап әбігерге түскен жұрттың қарасы көп.
«Қапшағай жағалауында мемлекет балансындағы екі үлкен әжетхана бар. Біреуі жағалаудың бас жағында, екіншісі аяқ жағында орналасқан. Жалпы көлемі 40 шаршы метр. Әжетханаларға 100 теңгеден төлейді. Өйткені тазалайтын адамдардың еңбекақысын төлеу керек, әжетхана қағаздарын, тазалағыш заттарды алу керек», — дейді «Қапшағай тұрғын үй» ЖШС директоры Абулхатр Орынбасар.
Арақашықтығы 685 метр жағажайда 43 кәсіпкер кәсібін дөңгелетіп, жағажай маусымында асықтары алшысынан түсіп тұр. Жергілікті жауапты мамандардың айтуынша, 43 кәсіпкердің 10-ы әжетхана орнатқан. Бас-басына орната берсе, жағажай әжетханадан көрінбей қалатынын айтады.
Ал санитарлық-эпидемиологиялық бақылау мамандары Қапшағай көлінің тазалығы туралы уәжі мынадай: «Көлдің су сапасын анықтау мақсатында ай сайын микробиологиялық, санитарлық-химиялық, паразитологиялық, вирусологиялық, ротовирустық инфекцияға және тырысқаққа сынама алынып, Қонаев қаласының ұлттық сараптама орталығына зерттеулерге жіберіліп тұрады. Бүгінге дейін сынаманың теріс нәтижесі тіркелген емес. Сол себепті, көлге дәрет сындырады, су лас деген қауесет жалған», — дейді «Қапшағай қалалық санитарлық-эпидемиологиялық бақылау басқармасы» РММ бас маманы Еламан Қожамқұл.
Қапшағайда 7 жағажай бар. Мамандардың айтуынша, 7 жағажайда да су таза.
