«Іле өзенінің суына Қонаев қаласының ауыз суы, Шеңгелді және Ақдала суару алқаптары, балық шаруашылығы, электроэнергетика, туризм салалары мен Балқаш көлінің экожүйесі тәуелді. Соңғы жылдары су аздық мәселесі тұрғындардың да, балық шаруашылығымен айналысатындардың да наразылығын тудырып келеді», — дейді Тынышбай Досымбеков.
Оның айтуынша, су азаюдың арты жақсылыққа соқпайды:
– Балқаш көлінде бұрындары 30 мың тонна балық болса, қазір балық 5 мың тоннаға дейін азайған;
– облыс аумағында Айқай құмнан бері қарай көптеген туристік объектілер бар. Сәйкесінше, судың 200-300 метрге кейін шегінуі туризмді тұралатады;
– Шеңгелді массивінде 12000 га жерге жуа егіледі. Бұдан бөлек, дәнді дақыл, қант қызылшасы бар. Мұндағы су азайса өнім түспейді;
– Қапшағай ГЭС-і 300 мВт электр энергиясын беруге жабдықталған. Қазір су аздығына байланысты жаздыгүні жұмыс жасайды да, қыстыгүні ГЭС жұмысы тоқтайды. Ары кеткенде 220 мВт ток беретін күші бар. Қапшағай ГЭС-не иелік ететіндер еш зиян көріп отырған жоқ, тиісінше бар қуаттылығымен ток өндіре алмай отырған бізге зияны көбірек;
– судың бірде көбейіп, бірде азаюы салдарынан Сарыешкі, Наурызбай деген секілді елді мекендерде ауыз су жоқ;
– Қапшағай су қоймасының өзіне келсек, қазір балық аулайтын 19-20 объектінің 7-8 ғана қалды.
Бұл мәселелер облыс әкімінің қатысуымен өткен жиында да талқыға түскен. Ендігі қалғаны шенділердің оңтайлы әрекетке көшіп, мәселенің бетін бері қаратқанын күту ғана.
