Қазіргі таңда 8 өңірде 30 мыңнан астам тергеу жұмыстары жүргізіліп, 4 мыңнан аса сот сараптамалары тағайындалды. Әрбір қамауға алынған күдікті бойынша олардың қылмысқа қатысы туралы мәлімет жеткілікті деді Бас прокуратура өкілі.
«Қазіргі уақытта 349 күдікті адамдар қамауда отыр. Олардың қиратуларға, ғимараттарды өртеуге, қаруларды жымқыруда, мемлекеттік объектілерге және құқық қорғау органдары қызметкерлеріне қарулы шабуыл жасауда белсенді түрде қатысқандығы анықталды. Барлығы қаңтар оқиғалары бойынша сотқа 479 қылмыстық іс жолданып, олар бойынша 545 адам сотталды. Ал билік өкілдеріне қатысты күш қолданған, мүліктерді зақымдауға байланысты ауыр қылмыстарды жасағандар сондай-ақ, залалды өтемеген және өтелмеген соттылығы бар 83 сотталушы нақты бас бостандығынан айыру жазасын алды», — деді Елдос Қилымжанов.
Сонымен қатар, Ақтөбе облысында 3 күдіктіге қатысты айыптау үкімі қабылданды. Олар 5 қаңтар күні Ақтөбе қаласының халықаралық әуежайын басып алған. Салдарынан стратегиялық объектінің жұмысы 2 тәуліктен астам мерзімге тоқтап, ішкі және халықаралық рейстер уақытынан кешіктіріліп, айтарлықтай залал келді. Сот заң бұзушыларға лайықты үкім шығарады.
«Алматы облысында процестік келісім бойынша Талдықорған қаласындағы жаппай тәртіпсіздіктерге қатысқан 5 белсенді шартты жазалар бойынша сотталды. Олар Қазақстанда тыйым салынған экстремистік ұйымның жақтаушылары. Шымкент қаласында сот үкімімен осы ұйымның 3 мүшесі 3 жылға бас бостандығынан айырылды. Олар жаппай тәртіпсіздіктерге қатысуға шақырумен шектелмей, өздері де әкімдік ғимаратын қиратуға қатысып, мемлекеттік мүлікке зақым келтірген. Сот актісі заңды күшіне енген жоқ», — деді Қилымжанов.
Қаңтар оқиғасына қатысып, елдің әлеуметтік экономикалық өміріне зиян келтіргендер жауапсыз қалмайды.
