Қасым-Жомарт Тоқаев мемлекет және қоғам қайраткері Талғат Мұсабаевтың дүниеден өтуіне байланысты оның отбасы мен туған-туыстарына көңіл айтты.
“Талғат Амангелдіұлы үш мәрте ғарышты бағындырған, ашық космосқа шығып, айтулы ерлігімен еліміздің атын әлемге танытқан батыр тұлға еді. Отандық аэроғарыш саласын дамытуға бар күш-жігерін жұмсап, еселі еңбек етті. Сенат депутаты және қоғам қайраткері ретінде көптеген игі іске бастамашы болды. Кәсіби біліктілігімен, айналасына сыйлы азаматтық қалпымен халықтың құрметіне бөленген Талғат Амангелдіұлының жарқын бейнесі ұмытылмайды. Иманы саламат, жаны жәннатта болсын, — деп жазылған жеделхатта.
Талғат Амангелдіұлы – Қазақстанның авиация генерал-лейтенанты, техника ғылымдарының докторы, еліміздің ғарыш саласына елеулі еңбек сіңірген бірегей тұлға. Ол 1994 жылы алғаш рет ғарышқа сапар шеккен қазақ ретінде тарихта қалды.
Ғарышкер 1951 жылы 7 қаңтарда Алматы облысы Жамбыл ауданына қарасты Фабричное ауылында туған.
2007–2016 жылдар аралығында ҚР Ұлттық ғарыш агенттігін басқарса, 2017–2023 жылдары ҚР Парламенті Сенатының депутаты болды.
Фото: el.kz
