Кремль басшысының айтуынша, кездесудің басты тақырыбы Украина төңірегіндегі жағдай болды. Путин АҚШ әкімшілігінің қақтығысты шешуге жәрдемдесуге дайын екенін атап өтіп:
«Біз әрдайым украин халқын бауырлас халық деп санадық. Қазіргі жағдай – біз үшін қайғы. Сондықтан бұл қақтығысты тоқтатуға шын жүректен мүдделіміз», – деді.
Ресей президенті дағдарысты еңсеру үшін Ресейдің алаңдаушылықтары ескеріліп, Еуропа мен әлемдегі қауіпсіздік саласында әділетті тепе-теңдік қалпына келуі керектігін айтты. Ол сондай-ақ Трамптың: «егер мен президент болғанда, соғыс болмас еді» деген пікірін қолдап, бұған кепілдік беретінін жеткізді.
Өз кезегінде Дональд Трамп келісімге қол жеткізу әзірге мүмкін болмағанын мойындады. Дегенмен ол кездесуді «өте жемісті әрі мазмұнды» деп бағалап, көптеген мәселелер бойынша белгілі бір ілгерілеу бар екенін атап өтті.
«Бүгін біз үлкен прогреске қол жеткіздік. Президент Путинмен қарым-қатынасым әрдайым жақсы болған», – деді ол.
Трамп кездесу аяқталған соң Еуропа көшбасшыларымен және Украина президенті Владимир Зеленскиймен телефон арқылы сөйлесетінін хабарлады. Сондай-ақ Путиннің шақыруымен Мәскеуге баруы мүмкін екенін жоққа шығармады.
Путин мен Трамп келіссөзден кейін бірлескен баспасөз мәслихатын өткізді, алайда журналистердің сұрақтарына жауап берген жоқ.
Кездесуге екі елдің сыртқы істер ведомстволары мен президент көмекшілері қатысты. Ресей тарапынан Сергей Лавров пен Юрий Ушаков, ал АҚШ тарапынан мемлекеттік хатшы Марко Рубио және арнайы өкіл Стив Уиткофф болды.
