Министрдің сөзінше, Конституцияға Президенттің Құрылтай депутаттарының көпшілік дауысымен бірқатар жоғары қызметтерге тағайындау жүргізе алатынын бекітетін норма енгізу ұсынылып отыр.
Атап айтқанда, Президент мына тұлғаларды Құрылтайдың келісімімен тағайындай алады:
-
Қазақстан Республикасының вице-президентін;
-
Премьер-министрді;
-
Конституциялық соттың 10 судьясын;
-
Орталық сайлау комиссиясының 6 мүшесін;
-
Жоғары аудиторлық палатаның 8 мүшесін.
«Президент Құрылтай депутаттарының көпшілік дауысымен аталған лауазымды тұлғаларды тағайындай алады деген норманы енгізу ұсынылып отыр», – деді Ерлан Сәрсембаев.
Сәрсембаевтың айтуынша, егер Құрылтай жоғары лауазымды тұлғаларды тағайындауға келісім беруден бір рет қайта бас тартса, онда Президентке Құрылтайды тарату құқығы беріледі.
Бұл ұсынылған модель Президент пен Құрылтай арасындағы саяси тепе-теңдікті қамтамасыз етуге бағытталған.
«Ең бастысы — жоғары лауазымды тұлғаларды тағайындау тек Құрылтайдың келісімімен жүзеге асады», – деді министр.
Сонымен қатар министр ұлттық қауіпсіздік, қаржылық тұрақтылық және заң үстемдігіне тікелей жауапты органдардың бірінші басшыларын Президенттің өзі тағайындау құқығы сақталатынын атап өтті.
Президент өзі тағайындайтын лауазымдар тізімі:
-
Бас прокурор;
-
Конституциялық сот төрағасы;
-
Жоғарғы сот төрағасы;
-
Ұлттық банк төрағасы;
-
ҰҚК төрағасы;
-
Орталық сайлау комиссиясының төрағасы;
-
Жоғары аудиторлық палатаның төрағасы;
-
Жоғары сот кеңесінің төрағасы;
-
Мемлекеттік күзет қызметінің бастығы;
-
Адам құқықтары жөніндегі уәкіл.
Министрдің түсіндіруінше, мұндай тәсіл аталған тұлғалардың мемлекет басшысы алдындағы жеке жауапкершілігін арттырып, кадрлық шешімдердің тез қабылдануына мүмкіндік береді.
«Бұл билік органдарының, әсіресе дағдарыс жағдайларындағы тұрақты жұмысын қамтамасыз етеді», – деді Ерлан Сәрсембаев.
