Қазақстан Президенті Қасым-Жомарт Тоқаев ұстаздар қауымын кәсіби мерекелерімен құттықтап, білім беру саласындағы еңбектері үшін ризашылығын білдірді. Ол педагогтердің ел болашағын қалыптастырудағы маңызды рөлін атап өтті, деп хабарлайды alataunews.kz.
Президент өз сөзінде елдегі білім беру жүйесін жетілдіру жолында атқарылып жатқан маңызды жұмыстарға тоқталды. Атап айтқанда, оның бастамасымен қабылданған «Педагог мәртебесі туралы» заң мұғалімдердің құқықтарын қорғауға және олардың әлеуметтік жағдайын жақсартуға ықпал еткенін жеткізді. Бұл заң аясында мұғалімдердің жалақысы артқанын, оларды артық міндеттерден босату шаралары жүзеге асырылғанын айтты.
Сонымен қатар, «Қазақстанның еңбек сіңірген ұстазы» атағы енгізіліп, бұл марапатпен бірге қаржылай сыйақы берілетіні және 46 мұғалімнің осы жоғары атаққа ие болғанын атап өтті. Академиялық дәрежесі бар ұстаздарға қосымша төлемдер қарастырылып, халықаралық жарыстардың жүлдегерлерін дайындаған педагогтерге қаржылай қолдау көрсетіліп жатқанын да айтты.
Болашақ педагог мамандарды қолдау шараларына да ерекше назар аударылып, осы жылы 16 мыңға жуық грант бөлінгенін және «Алтын белгі» иегерлерінің педагогика саласын таңдауының оң үрдіс екенін баса айтты.
