Үкімет отырысында Смайылов халықпен кездесулер өткізу және ол туралы баспасөзде алдын ала хабарлау – Президент тапсырмасы екенін атап өтті.
Ол министрлердің түрлі аймақ тұрғындарымен кездесуі кезінде ұялы байланыс пен интернет сапасы, электрлендіру мен газдандыру, ауыз сумен қамтамасыз ету және әлеуметтік мәселелер жиі көтерілгенін айтты.
«Отырыстардың жаңа форматына сәйкес, кез келген мәселенің шешімі мемлекеттік органдардың ресми интернет-ресурстарында орналастырылады. Барлық деңгейдегі әкімдер кездесу өткеннен кейін мәслихат сессияларында қаржыландыру мүмкіндігін талқыға салынатындай етіп, мәселелерді бір жүйеге келтіреді. Әкімнің тұрғындармен кездесуіне азаматтардың еркін қатысу принципін сақтау керек. Біз халық мәселесін, олардың сын-пікірлерін тыңдауымыз керек», — деді премьер-министр.
Ол әкімдермен өткен кездесулерде тұрғындар тарапынан 30 мыңға жуық сауалдар мен ұсыныстар түскенін атап өтті.
Сондай-ақ, ол түйіткілді мәселелерді жедел шешуге баса назар аударуды, ал экономика және ақпарат министрліктеріне тұрғындар тарапынан көтерілген барлық мәселені бір жүйеге келтіріп, оларды шешу бойынша іс-шаралар жоспарын бекітуді тапсырды. Және жер-жерлерге бюджеттен қаржы бөлінгенде халық айтқан мәселелер мен ұсыныстарды ескеру керек екенін айтты.
