Министрлік мәліметінше, 2025 жылғы 1 желтоқсандағы жағдай бойынша еліміздегі зейнеткерлер саны 2 млн 524 мың адамды құрайды. Осы кезеңде жиынтық зейнетақының орташа мөлшері 142 669 теңгеге жеткен. Оның ішінде ынтымақты зейнетақының орташа көлемі – 95 096 теңге, базалық зейнетақы – 47 573 теңге.
Еске салайық, 2025 жылғы 1 қаңтардан бастап базалық зейнетақы инфляцияның болжамды деңгейіне сәйкес 6,5 пайызға, ал ынтымақты зейнетақы инфляция деңгейінен 2 пайызға оза отырып, 8,5 пайызға арттырылды.
Сонымен қатар, Мемлекет басшысының тапсырмасына сәйкес, 2023 жылдан бастап бес жыл ішінде базалық зейнетақының ең төмен мөлшерін ең төмен күнкөріс деңгейінің 70 пайызына дейін, ал ең жоғары мөлшерін 120 пайызына дейін кезең-кезеңімен арттыру көзделген.
Министрліктің хабарлауынша, 2025 жылғы 1 қаңтардан бастап базалық зейнетақының ең төмен мөлшері ең төмен күнкөріс деңгейінің 65 пайызынан 70 пайызына дейін ұлғайтылып, 32 360 теңгені құрады. Ал ең жоғары мөлшері ең төмен күнкөріс деңгейінің 105 пайызынан 110 пайызына дейін өсіп, 50 851 теңгеге жетті.
Ведомство 2018 жылғы 1 шілдеден бастап мемлекеттік базалық зейнетақы төлемі зейнетақы жүйесіндегі еңбек өтілі ескеріле отырып, әр азаматқа жеке тағайындалатынын еске салды. Бұл ретте 1998 жылғы 1 қаңтарға дейінгі ынтымақты жүйедегі еңбек өтілі мен міндетті зейнетақы жарналары төленген кезеңдер есепке алынады.
Егер азаматтың зейнетақы жүйесіндегі еңбек өтілі 10 жыл немесе одан аз болса, базалық зейнетақы ең төмен күнкөріс деңгейінің 70 пайызына тең болады. Ал 10 жылдан асқан әр жыл үшін төлем мөлшері 2 пайызға артады. Мәселен, еңбек өтілі 20 жыл болған жағдайда базалық зейнетақы күнкөріс деңгейінің 90 пайызына тең. Ал 30 жыл және одан көп еңбек өтілі бар азаматтарға базалық зейнетақы ең төмен күнкөріс деңгейінің 110 пайызы мөлшерінде тағайындалады.
Ал жасына байланысты зейнетақы төлемдерінің мөлшері 1998 жылғы 1 қаңтарға дейінгі еңбек өтіліне (кемінде алты ай болуы тиіс) және зейнеткерлікке дейінгі кезеңдегі орташа айлық табысқа байланысты есептеледі.
