Алдымен облыс әкімі Қызылқайрат ауылындағы «AK JOL-M» мүмкіндігі шектеулі балаларды оңалту орталығына барды. Аймақ басшысы бұл орталықтың қызметі мен ондағы балалардың жағдайы әрдайым назарда екенін атап өтті.
2014 жылы ашылған орталықта бүгінде 300-ге жуық бала көмек алады. Күн сайын 70–80 бала тегін ем қабылдап, үш мезгіл тамақпен қамтамасыз етіледі. Орталыққа облыс әкімдігі тарапынан тұрақты қолдау көрсетіліп келеді.
Сапар барысында Марат Сұлтанғазиев Бірлік ауылындағы «Ұлттық құндылық» орталығында да болды. Бұл мекеме ерекше балаларды тәрбиелеп отырған аналарды қолдауға бағытталған.
Орталықта балалар мен аналар әртүрлі қолөнер бұйымдарын жасап, өз қабілеттерін дамытады. Сонымен қатар, мұнда ерекше қажеттіліктері бар балаларды оңалту мен қоғамға бейімдеу үшін барлық жағдай жасалған. Орталық заманауи медициналық құрал-жабдықтармен қамтылған.
Мекеме басшысы Зухра Серікқызының айтуынша, мұнда аналар мен балаларға кешенді психологиялық-педагогикалық, түзету және оңалту көмегі көрсетіледі. Сондай-ақ балалардың ақыл-ойын дамытуға арналған арнайы бағдарламалар жүзеге асырылады.
Кездесу қорытындысында облыс әкімі өңірде ерекше қажеттіліктері бар балаларға арналған осындай орталықтардың әлі де жеткіліксіз екенін атап өтті. Ол бұл бағыттағы жұмыстарды күшейту үшін әкімдік тарапынан барлық қажетті қолдау көрсетілетінін жеткізді.
Жұмыс сапары аясында аймақ басшысы Талғар қаласында өткен Наурыз мерекесіне де қатысты. Марат Сұлтанғазиев жиналған тұрғындарды Ұлыстың ұлы күнімен құттықтап, Талғар ауданының даму қарқыны жоғары екенін атап өтті.
«Талғар ауданы бүгінде қарқынды дамып келе жатқан өңірлердің бірі. Алдағы уақытта да ауданның әлеуеті артып, халықтың әл-ауқаты жақсара береді», – деді облыс әкімі.
