Мәжіліс Салық кодексіне енгізілген түзетулерді бірінші оқылымда мақұлдады. Енді Парламент Сенатының қарауына жібереді. Жеке тұлғалардың төлемдеріне әсер етуі мүмкін өзгерістердің арасында паспорттардың құны бойынша жаңалықтар да бар.
«Тіркеу функциясын «Азаматтарға арналған үкімет» Мемлекеттік корпорациясына тапсыруды ескере отырып, азаматтық хал актілерін тіркеу үшін төлемдерді алып тастау ұсынылады. Бұдан бөлек, төлқұжаттағы парақ санына қарай Қазақстан азаматының паспортын беру үшін мемлекеттік БАЖ-дың сараланған мөлшерлемелері, сондай-ақ балалар үшін мемлекеттік БАЖ-ды 2 есеге төмендету ұсынылады», — деді ҚР Ұлттық экономика министрі Әлібек Қуантыров.
Еске салайық, қазір қазақстандықтар төлқұжат үшін 8 АЕК төлейді, бұл 25 мың теңгеден асады. Сонымен қатар, балалар үшін де, зейнеткерлер үшін де жеңілдіктер жоқ. Стандарт бойынша құжатта 36 бет бар, алайда, Ұлттық экономика министрі түсіндіргендей, егер заң жобасы қабылданса, паспортты кішірек және үлкен көлемде рәсімдеуге болады.
