Мүфтият мәліметінше, ChatGPT сынды жүйелер – жасанды интеллектке негізделген, диалог форматында жұмыс істейтін бағдарлама. Ол мәтін аудару, ақпарат іздеу, деректерді саралау секілді техникалық тапсырмаларда пайдалы бола алады. Сондай-ақ жалпы діни білім алу барысында қосымша құрал ретінде қолдануға болады.
Алайда ҚМДБ діни үкім шығару мәселесінде ЖИ-ге жүгінуге болмайтынын қатаң ескертеді.
Неліктен ЖИ діни пәтуа бере алмайды?
Біріншіден, жасанды интеллект адамның жеке жағдайын, контексті мен ниетін ескере алмайды. Мәселен, отбасы, мұрагерлік немесе қаржыға қатысты мәселелер әр адамның өмірлік жағдайына байланысты ерекшеленеді. Шариғат бойынша мұндай сұрақтар тек нақты жағдайды толық зерттегеннен кейін шешіледі.
Екіншіден, ЖИ шынайы діни білімге емес, интернеттегі әртүрлі ақпарат көздеріне сүйенеді. Бұл көздер сенімсіз немесе дін талаптарына сәйкес келмеуі мүмкін.
Ғылыми негізді кеңес – тек маманнан
Мүфтият Құраннан мысал келтіріп, діни білім мен үкімге қатысты мәселеде міндетті түрде білім иелеріне жүгіну қажет екенін еске салды: «Егер білмесеңдер, білім иелерінен сұраңдар» (Нахл сүресі, 43-аят).
Осылайша, ҚМДБ мамандары жасанды интеллектті тек қосымша ақпарат құралы ретінде пайдалануға болатынын, ал діни пәтуа алу үшін міндетті түрде шариғатты жетік меңгерген ғалымдарға жүгіну керектігін алға тартты.
