Паркке мотоциклмен кіруге рұқсат. Олар да өзге көліктермен бірге жалпыға ортақ жолмен жүрулері тиіс. Алайда, мотоцикл тізгіндегендер заңды жиі бұзады. Парк аумағында сай-сала, су арналарымен жүйткіп, Қызыл кітапқа енген қырыққа жуық өсімдіктерді таптаған.
«Бір адам ғана жүрмейді. Топталып жүретіндіктен тауды жаңғыртып, қатты шу шығарады. Бұл шудың әсерінен жан-жануарлар үркеді», – дейді парктің ғылыми қызметкері Тұңғыш Жаппарқұлов.
Мототехниканың бағыт-бағдарын қадағалау қиын. Бақылау бекеттерін айналып өтетін әрекеттер жиі кездеседі. Жыл басынан бері мотоциклмен ұлттық паркке заңсыз кіру бойынша 15 дерек анықталып, 5 адамға әкімшілік хаттама толтырылды. Әрқайсысына 3 АЕК көлемінде айппұл салынды. Бірақ, тәртіпке бағынбай, орманшыларға ұстатпай, қашып кететін оқиғалар бұдан әлдеқайда көп.
Мамандардың пікірінше мотоцикл мен квадроцикл иелеріне қатысты арнайы әкімшілік бапты енгізу уақыты келді.
«Бұл мәселе бір де бір нормативтік-құқықтық құжатта көрсетілмеген. Тауда, әсіресе ұлттық парк аумағында мотоцикл немесе квадроциклмен жүретіндерге қатысты тәртіпті қатаңдатып, мемлекеттік тіркеу нөмірлерін тағуды міндеттеу керек. Бұған қоғам назарын аудару қажет», – деді экобелсенді Тимур Елеусізов.
Айта кету керек, ерекше қорғалатын табиғи аймақта екі мыңнан астам өсімдік түрі өседі. Сүтқоректі жануарлардың 48 түрі мекендеп, құстардың 198 түрі кездеседі.
