Сенат депутаты Нұрлан Бекназаров Құрылтай төрағасын сайлау тәртібіне қатысты өзгерістер ұсынылғанын мәлімдеді.
Депутаттың айтуынша, Құрылтай төрағасы мемлекеттік тілді еркін меңгерген депутаттар арасынан жасырын дауыс беру арқылы сайлануы тиіс.
«Құрылтайды мемлекеттік тілді еркін меңгерген депутаттар арасынан Құрылтай депутаттарының жалпы санының көпшілік даусымен жасырын дауыс беру арқылы сайланған төраға басқарады. Құрылтай төрағасы лауазымына кандидатураны Қазақстан президенті ұсынады», – деді Нұрлан Бекназаров.
Конституциялық реформа аясында Құрылтай төрағасының өкілеттіктері де айқындалып отыр. Атап айтқанда, төраға Құрылтай отырысын шақыруға, төрағалық етуге және қызметін регламентке сәйкес ұйымдастыруға жауапты болады.
Ұсыныстарға сәйкес, Құрылтайдың бірінші сессиясын Қазақстан президенті сайлау қорытындысы жарияланған күннен бастап 30 күннен кешіктірмей шақыруы тиіс.
«Құрылтайдың кезекті сессияларын өткізу мерзімі нақтыланған. Құрылтай сессиясын Қазақстан президенті ашады», – деді Бекназаров.
Құрылтай сессиялары арасындағы кезеңде Қазақстан президенті өз бастамасымен немесе Құрылтай төрағасының не депутаттардың кемінде үштен бірінің ұсынысымен кезектен тыс сессия шақыра алады.
Мұндай жағдайда тек сессияны шақыруға негіз болған мәселелер ғана қаралады.
