V Дүниежүзілік көшпенділер ойындарында Қазақстанның ұлттық көкпар құрамасы АҚШ командасын 12:4 есебімен жеңді, деп хабарлайды alataunews.kz.
АҚШ құрамасының ойыны алдыңғы жылдармен салыстырғанда жақсара түскен. Кеше көкбөрі ойнаған команда бүгін көкпарға шықты. Ертең біз жартылай финалда Ресей құрамасымен кездеспекпіз. Тобымызда бес команда болғандықтан, финалға дейін үш ойын өткізуіміз қажет болды. Басты қарсыласымыз Қырғызстан бүгін Түркияны жеңсе, олар да финалға шығады, – деп мәлімдеді ұлттық құраманың бас бапкері Абылай Манкеев.
«Қазанат» ипподромында өтіп жатқан көкпар сайысына 9 елдің командасы қатысуда. Барлығы 104 спортшы бұл спорт түрінен бақ сынауда. Көкпарға қатысушы елдер: Қазақстан, АҚШ, Ресей, Өзбекстан, Қырғызстан, Венгрия, Қытай, Моңғолия және Түркия.
Финалдық ойындар 12 қыркүйекте өтеді.
