Министрліктің мәліметінше, медициналық ЖИ-шешімдерді кеңінен енгізу бірнеше стратегиялық бағытты қамтиды. Ең алдымен, технологиялар өлім-жітім деңгейі жоғары ауруларды ерте анықтауға бағытталған.
Нақты айтқанда:
Инсультті ерте диагностикалау – уақыт шешуші рөл атқаратын жағдайларда жасанды интеллект секундтар ішінде диагноз қоюға көмектеседі.
Онкологиялық аурулар – өкпе және сүт безі қатерлі ісігін алғашқы кезеңде анықтау.
Стоматология – тіс саулығын цифрлық талдау арқылы бақылау.
Бұл шешімдер бүгінде тәжірибелік медицинада қолданылып, ауруды бастапқы кезеңде анықтаудың жоғары тиімділігін көрсетіп отыр.
ЖИ-құралдар қай өңірлерде жұмыс істеп тұр?
Қазақстандық дәрігерлер бірнеше отандық және халықаралық жасанды интеллект платформаларын белсенді пайдалана бастаған.
Олардың қатарында:
Cerebra – 5 өңірдегі 9 инсульт орталығында жұмыс істейді.
WDsoft – 10 өңірдегі 190 медициналық ұйымға енгізілген.
AIDENTIS – 65 стоматологиялық клиника мен 3 медициналық жоғары оқу орнында қолданылады.
ALIMA – еліміз бойынша 700-ден астам емханада дәрігерлерге ассистент ретінде көмектесуде.
Республикалық электрондық денсаулық сақтау орталығы жаңа ЖИ-агенттерді іске қосуды жоспарлап отыр. Бұл жүйелер дәрігерлер мен пациенттерге бірқатар маңызды қызмет көрсетпек.
Олардың міндеттері:
Көрсетілген медициналық қызметтерді автоматты түрде бақылау;
Зертханалық талдаулардағы ауытқуларды анықтап, дәрігер мен науқасқа бірдей хабарлама жіберу;
Клиникалық шешім қабылдау кезінде дәрігерге кеңес беру.
Болашақта жасанды интеллект құралдарын дәрі-дәрмектерге сараптама жасау және SmartЭКГ шешімдері негізінде созылмалы жүрек жеткіліксіздігін анықтау үшін де қолдану жоспарланған.
