Ішкі істер министрлігі жол қозғалысына қатысушыларға үндеу жасады, деп хабарлайды alataunews.kz.
«Күздің келуімен жол-көлік оқиғаларының қаупі арта түседі. Ауа райының өзгеруі қозғалысқа қатысушыларға қиындықтар тудырып, жаңбыр көрінуді нашарлатып, дөңгелектердің сырғанауына себеп болуы мүмкін. Жолдағы су жиналуы асфальттағы ойықтар мен шұңқырларды көруді қиындатып, қауіпсіздікке кері әсер етеді. Сондықтан жүргізушілерді барынша мұқият болуға шақырамыз.
Қараңғы уақытта жарық құрылғыларының дұрыстығын тексеріп, жарықтандырылған жолдарды таңдаңыз. Кенеттен пайда болған кедергілерден уақытында тоқтай алу үшін жылдамдықты төмендетіңіз. Күзгі уақытта температураның өзгеруіне байланысты, әсіресе көпірлер мен өткелдерде мұз қату қаупі бар екенін ескеріңіз. Жолға зейін қойыңыз, көлік жүргізу кезінде телефон қолданудан және басқа алаңдататын әрекеттерден бас тартыңыз. Жол ережелерін сақтап, жылдамдықты және қашықтықты бақылаңыз, қатты жылдамдықпен жүрмеңіз және басып озудан аулақ болыңыз. Жаяу жүргіншілерге назар аударып, жол жағдайын бақылауда ұстаңыз.
Автокөлік жүргізушілеріне ауа райының өзгерісін мұқият қадағалап, қолайсыз жағдайда қала сыртындағы сапарларды шектеу ұсынылады. Жаяу жүргіншілер ауа райының қиындығынан көліктің бірден тоқтай алмайтынын ескеріп, көшеден өтпес бұрын жолдың бос екеніне көз жеткізуі қажет. Ішкі істер органдарының қызметкерлеріне қиын жағдайға тап болғандарға көмек көрсету тапсырылды. Барлығыңызға қауіпсіз жол тілейміз!» – деді ІІМ әкімшілік полиция комитетінің аға инспекторы Ақтоты Боранова.
