Нақтырақ айтсақ, заңсыз полигондар саны 381, соның 132-сі облыс орталығында. Көбісі тұрғындардың жөндеу жұмыстарынан қалған және тұрмыстық қалдықтар. Мамандар ендігі уақытта қоқыс алаңдарын ғарыштан бақылау тоқтатылмайтынын ескертеді.
Экологтардың сөзінше, бүгінге дейін коммуналдық кәсіпорындар 7 заңсыз қоқыс алаңын тазалаған. Алайда бұл жерлер бұған дейін де бірнеше рет тазаланған. Ұдайы бақылаудың жоқтығынан тұрғындар қайта ластауды доғармай отырса керек.
«Қала сыртындағы аймақта бейнебақылау жоқ. Сәйкесінше, жылдың басында тазаланған жер қайта ластанып жатыр. Осылай қоқыс лақтыра берген адамдарды жауапкершілікке тарту керек», – дейді қала тұрғыны Мадина Маратқызы.
Қазір мұндай заң бұзушылық үшін 100 АЕК (306 300 теңге) айыппұл қарастырылған. Жыл басынан бері қала бойынша 59 лауазымды тұлғаға 4 млн теңгеден астам айыппұл салған. Алайда, айыппұл да адамдардың бұл әрекетін тоқтата алмай отыр.
Айта кетсек, облыста санитарлық талаптарға сай келетін арнайы 14 қоқыс полигоны бар. Біреуі Талдықорған қаласында орналасқан.
Мади Сайдильдин
