Басылым мәліметінше, биыл қазандағы қорытынды бойынша, киім бір жылда 14,6 пайызға қымбаттаған. Оның ішінде, елордада 25 пайызға, Қызылорда облысында 19,8 пайызға, Ақмола облысында 19 пайызға көтерілген. Республика бойынша ең баяу өсім Ақтөбе облысында тіркелді — 9,7 пайыз.
Бір жылда ерлер киімі 14 пайызға, әйелдер киімі 14,1 пайызға, балалар киімі 17,2 пайызға қымбаттады.
Қаңтар-тамыз аралығында импортпен келген трикотаж және тоқыма өнімдерінің көлемі 71 мың тонна болған. Бұл ақшаға шақсақ, 888,9 млн доллар.
Қазақстанға ТМД елдерінен 16,9 мың тонна өнім әкелінген. Бұл бұрынғыдан 2,9% кем. Негізгі жеткізуші – Өзбекстан: 10,2 мың тонна.
ТМД құрамына кірмейтін елдерден 54,1 мың тонна киім әкелінген. Бұл былтырғыдан 17,8% артық. Негізгі жеткізушілер Қытай (39,3 мың тонна) мен Түркия (12 мың тонна) болып отыр.
Қаңтар-қыркүйек аралығында елдегі киім өндірісінің ақшалай көлемі 43,1 млрд теңге болды. Бұл бір жыл бұрынғы көрсеткіштен 12,7% көп.
Ең үлкен өндіріс көлемі Шымкентте тіркелді — 7,4 млрд теңге (+44%). Одан кейін Алматы қаласында 6,9 млрд теңгенің (+15,2%) және Алматы облысында 4,2 млрд теңгенің (-48,6%) киім-кешегі өндірілген.
