Алматы қаласы бойынша Мемлекеттік кірістер департаментінің қызметкерлері кедендік тексеру жүргізу кезінде «сәйкестендіру құралдарымен таңбалаусыз темекіні» заңсыз алып өтуге байланысты кеден заңнамасын бұзудың 3 фактісін анықтады. Барлық 3 фактінің қылмыстық құқық бұзушылық белгілері бар.
Мысалы, «Алматы» кедендік ресімдеу орталығының қызметкерлері Біріккен Араб Әмірлігінен Қазақстан Республикасының аумағына әкелінген жүкті тексеру кезінде таза салмағы – 24,2 тонна, (1,422 млн қорап) темекі тапты. Бюджетке төлеуге тиісті кедендік төлемдердің, салықтардың және акциздің сомасы – 403 млн теңге болды. Материал сотқа дейінгі тергеп-тексеру туралы мәселені шешу үшін көлік прокуратурасына берілді.
Сондай-ақ, «Алматы» КРО қызметкерлері Латвиядан Қазақстан аумағына әкелінетін, салмағы – 13 тонна (656 мың қорап) осыған ұқсас жүкті ұстады. Бюджетке төлеуге тиісті сомасы – 184,5 млн теңге.
«Жетісу» кеден бекетінің қызметкерлері кедендік тексеру барысында инвойсқа сәйкес 45,6 мың орам көлемінде «дәретхана қағазы» деп мәлімделген тауарды анықтаған. Алайда, дәретхана қағазы емес темекі тауары екені анықталды. Саны – 2, 090 млн қорап. Бюджетке төлеуге тиісті алдын ала есептелген сомасы – 587,9 млн теңге», — делінген Комитеттің баспасөз қызметі таратқан хабарламада.
Айта кетсек, 2020 жылғы қазаннан бастап барлық импортталған сигареттер Қазақстан аумағына не кеден қоймаларына әкелгенге дейін сәйкестендіру құралдарымен таңбалануға тиіс.
