«Билеттің бағасы 8-10 мың теңгеден басталып, сахнаға жақын орындардың құны 40 мың теңгеге дейін жетті. Қазір фан-аймақта 10 мың теңгелік және қымбат орындардың билеттері ғана бар. Билет сатылымға шыққан күннен бері сатып алушылардың саны артып жатыр», — деді онлайн билет сататын компанияның бас директоры Виктория Торгунакова.
Сатылған билеттердің 5 мыңға жуығын өзге елдің тыңдармандары алған. Щвейцария, Франция, Украина, Қытай, Катар, АҚШ, Бразилия және Аргентина сынды жалпы саны 50 елдің азаматтары концертке билет алыпты. Димаш Құдайбергеннің алғашқы жеке концертіне әлемнің 68 елінен жанкүйер келіп үлгерген.
«Мен Ұлыбританиядан арнайы келдім. Димаш туралы алғаш ютубтан білдім, жүздескім келді. Кейін бүкіл Еуропадағы концертіне бардым, Дюссельдорфта да болдым. Қазір міне, Алматыға келдім. Қуанышымда шек жоқ», – деді әншінің жанкүйері Триса Нэвиш.
Билеттер 14 шілдеден бастап саудаға шығарылған. Алғашқы екі тәулікте 10 мыңнан аса билет сатылыпты.
«Локдаун аяқталғаннан кейін Дюссельдорфта Димаштың концерті өтті. Кейін Прагада болды. Мен Димаш үшін Қазақстанға келдім. Ол – менің сүйікті әншім. Оны жанкүйерлер клубында көретінімді ойласам, бақыттан басым айналады», – деді Бразилиядан келген Беатрис Александр.
Сырттан келген жанкүйерлердің көптігінен тіпті бірақтар қонақүйлерде қазірдің өзінде бос орын қалмаған.
«Биыл екінші тоқсанның қорытындысы бойынша Алматы қаласындағы қонақүйлер 38,4% толған. Ол өткен жылдың сәйкес уақытымен салыстырғанда 13,7% өсті. Ал Димаш Құдайбергеннің концертіне байланысты қонақүйлердің толуы 80% дейін жетеді», — деді қалалық Туристік ақпараттық орталық директорының орынбасары Бауыржан Пазылхайыр.
Димаш Құдайбергеннің жеке концерті 23 қыркүйек күні кешкі сағат 20:00-де Орталық стадионда өтеді. Концертте тыңдарман сүйіп тыңдайтын композициялармен қатар, жаңа туындылар да шырқалады. Ұйымдастырушылардың айтуынша, шара өте ерекше форматта өтпек.
«Біз ауқымды шоу дайындап жатырмыз. Қазір дайындық жұмыстарымен түрлі мемлекеттен келген 200-ден аса маман айналысып жатыр», – деді ұйымдастырушы Екатерина Бажанова.
Димаштың концерті 3 сағатқа созылады деп жоспарланып отыр. Сондай-ақ қауіпсіздік шаралары қатаң қадағаланбақ. Ал 24 қыркүйек күні сағат 21:00-де Димаш Құдайберген «Алматы арена» спорт кешенінде жанкүйерлерімен кездесу өткізеді. Оған қатысамын деушілерге есік ашық.
