Бұл норма зейнет жасына байланысты төлемдерге де, тұрғын үй жағдайын жақсарту немесе емделу мақсатында алынатын біржолғы зейнетақы төлемдеріне де қатысты.
Алайда бұл жеңілдік Қазақстан Республикасының резиденті болып саналмайтын азаматтардың зейнетақы жинақтарына қолданылмайды.
Еске салайық, бұған дейін БЖЗҚ-дан төленетін барлық зейнетақы төлемдері табыс ретінде қарастырылып, төлем көзінен 10 пайыз мөлшерлеме бойынша жеке табыс салығы ұсталып келген. Оның ішінде біржолғы зейнетақы төлемдері де салық салынатын табыс санатына кірген.
Енді 2026 жылдың 1 қаңтарынан бастап Қазақстан резиденттері үшін зейнетақы төлемдерінің барлық түрінен, соның ішінде біржолғы зейнетақы төлемдерінен де жеке табыс салығы ұсталмайды.
Сонымен қатар бұған дейін зейнетақы жинақтарын пайдалану кезінде салық төлеуді кейінге қалдырған азаматтар үшін де маңызды өзгеріс бар. Жаңа талаптарға сәйкес, олардың кейінге қалдырылған жеке табыс салығы толықтай жойылады.
Бұл өзгерістер азаматтардың зейнетақы жинақтарын тиімді пайдалануға және әлеуметтік қолдауды күшейтуге бағытталған.
