Бұл әлеуметтік салаға бөлінген қаражаттың шамамен 65%-ы. Аталған қаражат білім нысандарының құрылыс жұмыстарына, материалдық-техникалық базасын нығайтуға, инновациялар мен заманауи қауіпсіздік жүйелерін енгізуге және басқа да маңызды іс-шараларға бағытталуда.
Бұл туралы бүгін Талдықорғандағы І. Жансүгіров атындағы Мәдениет сарайында өткен педагогтардың тамыз конференциясында Жетісу облысының әкімі Бейбіт Исабаев айтты.
Оның айтуынша, өңірде 3 жастан 6 жасқа дейінгі балаларды мектепке дейінгі біліммен қамту көрсеткіші 98,3% құрап отыр. Білім сапасының деңгейі — 64,2%. Оқыту мен тәрбиені тең алып жүру үшін мектеп пен ата-аналардың өзара жауапкершілігіне негізделген «оқушы — мектеп — ата-ана» бірлескен жұмыс форматы енгізіледі.
Облыс әкімі жастардың кәсіби техникалық даярлығы мәселесіне ерекше көңіл бөлді. Аймақтағы кәсіптік білім беретін мекемелерде 50 мамандық, 93 біліктілік бойынша мамандар даярланады. Қазіргі уақытта қажетті мамандықтар үшін облыстық бюджеттен 192,1 млн.теңге бөлініп отыр.
«Облыста іргелі өнеркәсіп орындарын ашуға бағытталған көптеген ірі жобалар қолға алынып жатыр. Біздің колледждеріміз ертеңгі күні соларға қандай мамандар қажет болады, жастарды қай бағытта оқыту керек дегендей нарықтың сұранысына бейімделе білуі тиіс. Жергілікті атқарушы органдар мен білім басқармасы облыста жұмыс істейтін кәсіпорындар мен ауыл шаруашылығы кешендеріне қажетті мамандарды анықтау жұмыстарын бірлесіп жүргізуі керек. Еңбек нарығындағы ұсыныс пен сұраныс бір-бірімен тепе-тең болғанда, жастарды оқыту мен жұмыспен қамту, кадр тапшылығы сияқты мәселелер бірте-бірте шешілетін болады», — деді Бейбіт Исабаев.
Жалпы облыстағы 340 мектепте 15 691 мұғалім, 405 мектепке дейінгі білім беру ұйымында 3328 педагог жұмыс істейді. Өңірдегі педагог кадрларға қажеттілік 176 бірлікті құрап отыр. Соның басым бөлігі Кербұлақ, Ақсу, Алакөл аудандарында.
